Балаҕан ыйын 25 күнүгэр киэҥ туттар биир дойдулаахпыт, биллиилээх бэйиэт, публицист, очеркист, Былатыан Ойуунускай аатынан Судаарыстыбаннай бириэмийэ лауреата, ССРС суруйааччыларын Сойууһун чилиэнэ, бөдөҥ уопсастыбаннай диэйэтэл Сергей Степанович Васильев-Борогонскай төрөөбүтэ 116 сылын бэлиэтиибит.
Солко күөх оттоох, дьоһун-мааны дьоннордоох Суотту күөх хонуутугар күн сирин көрбүтэ киһи киэнэ аҕыс кырыылааҕа Сергей Степанович Васильев-Борогонскай. Сергей Васильев саха литературатын сайыннарыыга сүҥкэн кылааты киллэрбит, норуот таптаан ааҕар кэрэ айымньыларын айан хаалларбыт уус-уран тыл бөдөҥ маастара, чаҕылхай талааннаах суруйааччы, дьон-норуот туһугар олорбут, үлэлээбит дьиҥнээх патриот буолар. Сергей Васильев саха литературатын көмүс фондатыгар киирэр айымньылары, оҕолорго аналлаах олоҥхолору анаан-минээн суруйбута ураты кэрэхсэбили ылар. Поэт сырдык патриотическай тыыннаах айымньылара күн-дьыл аастаҕын ахсын өссө тупсан көстөллөр, саха литературатын ураты кустугун биир кэрэ-бэлиэ өҥө-дьүһүнэ буолан сырдыы-күлүмнүү оонньууллар.
С.С. Васильев сырдык аатын үйэтитэн оскуола үөрэҕин программатыгар кини айымньыларын, олоҥхолорун үөрэтии киирбитэ. Улуус, республика эрэ үрдүнэн буолбакка, Россия таһымыгар Васильевскай ааҕыылар ыытыллаллар. Поэт аатын Уус-Алдан улууһун киин библиотеката, Суотту нэһилиэгин Хоноҕор сүрүн оскуолата, Хоноҕор киин уулуссата уонна музей сүгэллэр.
С.С. Васильев-Борогонскай олоҕун, айар үлэтин сырдатар "Үйэлэри үрдүнэн хардыылыыр аналлаах" куйаар ситимин нөҥүө ыытыллар викторинаҕа көхтөөх кыттыыны ыларгытыгар ыҥырабыт.
