2005 сыл сэтинньи 25 күнэ биһиэхэ барыбытыгар дьоһун суолталаммыта – бу күн ЮНЕСКО Олоҥхону киһи аймах тылынан уонна өйүнэн айбыт култуурунай нэһилиэстибэтин үйэттэн үйэҕэ бэриллэр күндү баайа диэн аан дойду шедеврдэрин ахсааныгар киллэрбитэ. Бу улахан ситиһиибитин кэрэһэлээн биһиги өрөспүүбүлүкэбитигэр Олоҥхо күнэ олохтоммута.
Бу бэлиэ күн Олоҥхо биһиги олохпутугар ураты суолтатын бэлиэтиэх тустаахпыт. Олоҥхоҕо биһиги омукпут култуурунай куода – саха омук киһи буолар килбиэнэ, өлбөт-сүппэт силиһэ, тускулаах туруга кистэнэн сылдьар диэн бигэ итэҕэллээхпит. Биһиги олоҥхобут былыргы дьыллар былдьаһыктаах мындааларыгар, урукку дьыллар охсуһуулаах уорҕаларыгар тыйыс дойдуну сылаас тыыннаабыт саха омук эйэлээх суолу тэлэригэр, уйгулаах олоҕу уһанарыгар төһүү буолбут модун кыаҕын, өркөн өйүн, суолдьут сулуһун, духуобунай күүһүн туһунан дириҥ билиини биэрэр.
Олоҥхо декадатын иһинэн ыытыллар тэттик викторинаҕа көхтөөх кыттыыны ыларгытыгар ыҥырабыт.
